VII, Era par ben que valors se desfai,

VII.

Era par ben que valors se desfai,

E podetz o connoisser e saber,

Quar selh que plus volia mantener

Solatz, domney, largueza ab cor verai,

Mezura e sen, conoissensa e paria,

Humilitat, orguelh ses vilania,

E 'ls bons mestiers totz ses menhs e ses mai,

Es mortz, Guillems Malespina marques

Que fo miralhs e mayestre dels bes.

De bons mestiers el mon par non li sai,

Qu' anc non fon tan larcs, segon mon parer, 

Alixandres de manjar ni d' aver,

Qu' elh non dis non qui 'l quis, n' i trobet plai, 

Ni ges d' armas Galvains plus non valia,

Ni non saup tan Yvan de cortezia,

Ni s mes Tristans d' amor en tan d' assai;

Hueymais non er chastiatz ni repres

Negus, si falh, pus lo miralhs no y es.

On son eras siei dig plazent e guai,

E siei fag plus poderos de poder,

Qu' els autres fagz fazian desvaler.

Oi dieus! cum son escurzit li clar rai

Qu' alumavan Toscana e Lombardia,

Per que quascus anava et venia,

Ab lo sieu nom, ses dopte e ses esmai,

Qu' aissi saup pretz guizar, tan fon cortes,

Cum l' estela guidet los reys totz tres.

Per cui venran soudadier de luenh sai,

Ni 'l ric joglar que 'l venian vezer,

Qu' elh sabia honrar e car tener

Plus que princeps de sai mar ni de lai,

E manhta gens ses art, ses joglaria,

Per lo sieu don on negus non falhia;

Que manh caval ferran e brun et bai

Donava plus soven et autr' arnes

De nulh baron qu' ieu anc vis ni saubes.

Belhs senher cars, valens, e que farai?

Ni cum puesc sai vius ses vos remaner?

Que m sabiatz tan dir e far plazer

Qu' autre plazers contra 'l vostre m desplai;

Que tals per vos m' onrava e m' aculhia

Que m' er estrans, cum si vist no m' avia;

Ni ja nulh temps cambi non trobarai

Ni esmenda del dan qu' ai per vos pres,

Ni eu non cre qu' om far la m' en pogues.

Lo senher qu' es una persona en tres

Vos valha aissi cum ops ni cocha us es.

Aimeri de Péguilain.

VI, Ailas! per que viu lonjamen ni dura

VI.

Ailas! per que viu lonjamen ni dura

Selh que totz jorns vei creysser sa dolor,

Qu' er son tornat tug li miey gaug en plor

Per un fel dol que dins mon cor s' atura;

Q' uey non es joys tan grans, quan m' o cossir,

Qu' el dol qu' ieu ai me pogues escantir;

Per so non puesc motz ni sos acordar,

Qu' om, quan plora, no pot ges be chantar.

Chantar m' ave tot per aital natura

Cum lo signes que chanta ab dolor

Quan mor, et ieu chan, planhen mon senhor

Que ai perdut, ab dol et ab rancura,

N Ono Sanchitz, per cui degra morir

Quan lo perdiey, s' om si degues aucir;

E quant hom pert son bon senher e car

Degra morir, pus mais no 'l pot cobrar.

Ja non diray tan gran dezaventura,

Senher N Ono, sitot m' ai gran dolor

Que siatz mortz, quar diria folhor;

Qu' aysselh es mortz de cuy dieus non a cura,

Mas dieus vos a mandat a se venir,

Quar saubes luy e joy e pretz servir;

Mas selhs son mortz que us solion amar,

Que us an perdut, senher, ses recobrar.

Ab vos es mortz sens, franquez' e mezura,

Per que totz hom en deu aver dolor,

E tug bon ayp que tanhon a valor

Moron ab vos, per que reviu falsura

Say entre selhs que no s' en fan grazir;

Mas qui vol pretz els vostres faigz se mir,

Qu' aissi sabra dieu e pretz guazanhar,

E si mezeys e tota re honrar.

Ar puesc ben dir que tot lo mon peiura,

Q' uey non es joys que non torn en dolor,

Mas sol del ric joy de nostre senhor;

Per que m par folh qui enten ni s' atura

En autre joy mas en dieu obezir.

Segle caitiu, ab dolor faitz fenir

Totz vostres faigz, per qu' om no s deu fizar 

En vostr' amor, mas per son benestar!

Senher N Ono, de vos puesc per ver dir

Qu' anc non l' ames mas quan per dieu servir,

E per los sieus enantir et honrar,

E per los mals confondre et abaissar.

Senher, dieu prec la vostr' arma ampar,

Que say m' avetz pro layssat que plorar.

Aimeri de Bellinoi.

V. Cascus hom deu conoisser et entendre

V.

Cascus hom deu conoisser et entendre

Que riguessa ni sens ni cortesia,

Que sia el mon, no ns pot de mort defendre;

C' al jorn c' om nai comensa a morir,

E qui mais viu plus poigna de fenir;

Doncs ben es fols cel q' en sa vida s fia,

Si be s pensa de prion sa foillia;

Car nos es tost lo gentils cors faillitz

D' una valen comtessa Biatritz.

Doncs negus hom non pot per dreich contendre

Oimais, en tant cum dieus ten en baillia,

Ja 'n puosca mais sa par de valor rendre,

D' enseignamen ni d' aut cor, don dei dir:

E puois dieus se de mort non vole garir

Qui totz los bes del mon complitz avia,

Ja non fara als autres seignoria;

Que tuich morrem, e qui mais er grazitz,

Ni plus ama 'l segle, mais n' er trahitz.

Cum ausam doncs aquesta mort atendre,

Quand adobat trobam a chascun dia

Que nostra mort podem en vida rendre!

Car dieus nos ditz que l' anem lai servir

On el fo mortz per nos dampnatz garir;

E qui morir per lui vengar volria,

Cobran son dreich qu' a perdut en Suria,

Ab gran razon venria gent garnitz

Al jutgamen, lai on er Ihesu Cristz.

Qui per dieu vai l' aver e 'l cor despendre,

De paradis l' er uberta la via;

E qui no i vai deu baissar e dissendre

De tot onor; car tem que dieus l' azir

Qui reman sai ni pot anar garnitz;

Qu' ieu sai de tals c' avers e manentia

E diables e pechatz e bauzia

A 'ls retengutz cum fals avars aunitz,

Guerriers de dieu e de totz bes partitz.

Ben se cuiden en las terras estendre

E far conquistz, mas autramen cuich sia,

Car dieus, lo reis, sap s' arbalesta tendre,

E trai cairels trenchans per ben ferir;

E negus hom del colp no s pot gandir,

Quand el s' irais e vei c' om no s chastia;

Mas qui 'l dopta ni vas lui s' omelia

Aquel aura chapdel sains esperitz;

E qui no 'l fai er en enfern punitz.

A totz degra de dolor lo cor fendre

Del deseret del fill sainta Maria,

Mas col laire qui ve los autres pendre

S' esforsa plus del mal, ses repentir,

E 'l mal segle, don dieus nos lais issir,

A salvamen si cum ops nos seria;

E mon Thesaur que lais en Lombardia

Don dieu salut, car de totz nos es guitz,

E dels crozatz los cors e 'ls esperitz.

Gaucelm Faidit.