Lanfranc Cigala. Ges eu non sai com hom guidar se deia

Lanfranc Cigala.

Ges eu non sai com hom guidar se deia

Segon lo temps e la sazon que cor,

Q'om de servir non a grat ni lauzor;

Non dic eu ges per o q'om s' en recreia,

Qar de tan pauc non es hom offendenz,

Si tot o fai desapensadamenz,

Q'el non sia malvolgutz e blasmatz;

Aiso mi par ben juecs desegalatz,

Qu'el bes sivals degr' esser grazitz tan

Com es blasmatz lo mals a cels qu' el fan.

Mas sazos es, pos dreitz non seignoreia,

De mudar cor e de cambiar color,

E que semblon li leial trichador

E li plus fin jugador de correia;

Mas savis hom non pot esser fegnenz,

Greus causa es, mas adoncs par sos senz

Quan no 'l sobra talanz ni voluntatz;

Qu'el savis hom, quan ve qu' es enganatz,

Si l' engan pot revirar ab engan,

Non pot miels far aparer son sen gran.

Dieus fon traitz, per que no s taing qu' om creia

Semblan ni ris ni salut de trachor,

Que denan ri e mostra far honor,

E pois detras poing l' amic e 'l guerreia;

Non pot esser plus mortals faillimenz,

Qar de Judas, qui s' en pendet als venz,

Saben per cert que no il fo perdonatz;

Mas eu sivals meillor conven lor fatz,

Sol pendan si li fals que trait m' an,

Qu' ieu lor perdon mon enueg per lor dan.

S' ieu sui traitz, temps mi don Dieus qu' ieu veia

Que d' aital juec posca jogar a lor,

E qui d' aisso mi tengues traidor,

Pauc de saber auri' e trop d' enveia,

Que segon dreg non es ges traimenz

Trair trachor; qu' aissi tot engalmenz

Com es trair son amic malvestatz,

Es son trachor trair pretz e bontatz;

Per que non fail de ren, al meu semblan,

Qui de trair son trachor a talan.

Non dic eu ges, pos lo traitz plaideia

Ab son trachor, ni 'l ten sa bon' amor,

Que ill deia pois percassar desonor,

Qar dreitz no 'l vol ni razos no l' autreia,

Que quant hom fai perdon grazidamenz,

Non entendatz dels gratz que forsa venz;

Tot atressi taing que sia oblidatz

Lo faillimenz, co s' anc jorn no fos natz;

E qui pois vai son trachor mal sercan

De blasm' el trai, e sobre se l' espan.

S' ieu sui traitz, ges n' ai fag fin, ni fatz

Perdon, per qu' ieu non puosc esser blasmatz:

Mas, si venra sazos, ben ai talan

Dels fals trachors trair que trait m' an.

Boniface Calvo. Enquer cab sai chanz e solatz,

Boniface Calvo.

Enquer cab sai chanz e solatz,

Pos los mante lo reis N Anfos;

Mas si per lui tot sol no fos,

Ja 'ls agron del tot oblidatz;

E pois qu' el los vol mantener,

Non met amor a noncaler;

Car, sens amor, chanz ni solatz no val,

Ni a sabor plus que conduitz ses sal.

Per amor fon chantars trobatz,

Car chantars et esser joios

Es dreitz mestiers dels amoros

E dels autres non, so sapchatz,

E mais dic c'om non pot valer

Granmen, ni far ben son dever

En nuil afar, ni s sab gardar de mal

Cortezamen, pois que d' amor no il cal.

E s' el reis N Anfos, qu' es senatz

En totz faitz e valens e pros,

Lauza mon dig, ben es razos

Qu'el dei' esser enamoratz,

E qu' el, ab amoros voler,

Se voill' en guiza chaptener,

Per qu' amatz sia coralmen de tal

Com taing al seu fin pretz sobrecabal.

E sitot es l' albres loingnatz

Per que il fo l' amars saboros

Del sieu digne frug glorios,

No s laisset tant e tal c' assatz

Pot del mescap restaur aver;

E car en posc ben dir lo ver,

Fatz mon mestier, mas non dirai ges qual,

Car ai paor de plaig descomunal.

E s' en fol no m sui trebaillatz,

Ben m' en venra tals guiardos,

Qu'en seran trist' e consiros

Cil per qu' eu sui sems e mermatz

Del gran deport e del plazer

Qu' ieu soil aver lo jorn e 'l ser

Dels mieus mestiers, don ai dolor coral,

E maint autre que no i podon far al.

Reis de Castell', al mieu parer,

Be us ai per mon chan fag saber

So qu' ieu devia per plazer de tal

Que us deu plazer, si us plai, so que mais val.

Sordel. Qui be s membra del segle qu' es passatz,

Sordel.

Qui be s membra del segle qu' es passatz,

Com hom lo vi de totz bos faitz plazen,

E com hom ve malvatz ni recrezen

Aquel d' aras, ni com ja restauratz

Non er per cel qui venra plus malvatz,

Totz hom viuria ab gran dolor, membran

Cals es, ni fo, ni er d' aissi enan.

Mas non es dreitz c'om valens ni prezatz

Si recreza per aital membramen,

Ans taing s' esfors tot jorn plus vivamen,

Com sufra 'l fais de pretz qu' es mesprezatz;

Car cel val mais que plus fort n' es cargatz,

E car es dreitz s' esforzon li prezan

De ben, on plus l' avol s' en van laissan.

En plus greu point non pot nuls esser natz

Com cel que pert Dieu e 'l segle eissamen;

Tot aital son li trist, malvatz manen

Q' an mes a mort domnei, joi e solatz:

Tan los destreing nonfes e cobeitatz

Q' onor e pretz en meton en soan,

E Dieu e 'l mon en getan a lor dan.

Ai! com pot tant esser desvergognatz

Nuls hom gentils qe i s vai embastarden

Sos lignatges per aur ni per argen,

Que l' avers vai leumen e la rictatz,

E 'l vida es breus e la mortz ven viatz;

Per q'om degra lialmen viure aman

Dieu, retenen del mon grat, gen regnan.

Dels maiors mov tota la malvestatz,

E pois apres de gra en gra deissen

Tro als menors, per que torn' a nien

Jois e pretz, si que, qui pretz vol ni 'l platz,

Pot n' aver leu, car tan n' es grans mercatz

Que per cinc sols n' a hom la pessa e 'l pan,

Si 'l tenon vil li ric malvatz truan.

N' Agradiva, quals que s' estes malvatz,

Per vos m' azir malvestatz et engan,

Et am valor e pretz e joi e chan.

Al rei tramet mon sirventes viatz

Cel d' Arago, qu' ell fais lo plus presan

Sosten de pretz, per c'ell ten entrenan.