Tenson de Lanfranc Cigala et de la Dame Guillelma de Rosers.

Tenson de Lanfranc Cigala et de la Dame Guillelma de Rosers.

Na Guillelma, man cavalier arratge

Anan de nueig, per mal temps que fasia,

Si plagnian d' alberc en lor lengatge,

Auziron dui bar que, per drudaria,

S'en anavan vas lur domnas non len.

L' us s' en tornet per servir cella gen,

L' autre s n' anet vas sa domna corren.

Qals d' aquels dos fes miels so que 'l taignia?

Amic Lanfrancs, miels complit son viatge,

Al meu semblan, cel que tenc vas s' amia;

E l' autre s fes ben, mas son fin corratge

Non pot saber tan ben si donz a tria

Con cel que 'l vi denan sos oils presen,

Q' atendut l' ac sos cavalliers conven.

E val trop mais qui so que dis aten,

Que qui en als son corratge cambia.

Domna, si us platz, tot can fes d' agradatge

Lo cavalliers que, per sa gaillardia,

Gard' els autres de mort e de damnatge,

Li moc d' amor; que ges de cortezia

Non a nuls homs si d' amor no 'l deisen;

Per qu' el si donz deu grazir per un cen,

Car deslivret per s' amor de turmen

Mantz cavalliers que s vist en la via.

Lanfrancs, oimais non razones mesatge

Tan gran, con fes aquel que tenc sa via;

Que, sapchatz ben, mout i fes gran oltratge,

Pos bels servirs tan de cor li movia,

Car non servi si donz premieiramen;

Et agra 'n grat de leis e jauzimen

Pois per s' amor pogra servir soven

E mans bos luocs, que faillir no i podia.

Domna, perdon vos quier, s' ieu dic follatge,

Q' ueimais vei so que tot o mescrezia,

Que non vos plai qu' autre pelegrinatge

Fassan li drut, mas vas vos tota via.

Per que cavals, c'om voill que biort gen,

Deu om menar ab mesur' e ab sen.

E car los drutz cochatz tan malamen

Lur faill poders, don vos sobra feunia.

Lanfrancs, vos dic que son malvatz usatge

Degra laissar, en aquel mezeis dia,

Lo cavaliers qe domna d' aut paratge,

Bella e pros deu aver en baillia;

Qu'en son alberc servis hom largamen;

Ja el no y fos, mas chascuns razon pren,

Car sai que ha tan de recrezemen,

Q'al maior ops poder li failliria.

Domna, poder ai eu et ardimen,

Non contra vos que us venses en jazen,

Per qu' eu fui fols car ab vos pris conten,

Maz vencutz voill que m' aiatz con que sia.

Lanfrancs, aitan vos autrei e us consen,

Que tant mi sent de cor e d' ardimen

Qu'ab aital geing, con domna si defen,

Mi defendri' al plus ardit que sia.

Tenson de Pistoleta et d'une Dame.

Tenson de Pistoleta et d'une Dame.

Bona domna, un conseill vos deman

Que m' el dones, que molt m' es grant mestier;

Qu'en una domna ai mes tot mon talan,

Ni nuilla ren tan no desir ni quier;

E diguas me si laudatz que l' enquera

De s' amistat, o enquar m' en sofrieira;

Qu'el reprovier retrai certanamen:

Qui s cocha pert, e consec qui aten.

Seingner, ben dic, segon lo mieu semblan,

Que ben o fai qui bona domna enquier,

E cel sap pauc qui la va redoptan;

Car anc domna no feri cavalier,

Mas s' el no ill platz que s' amor li profera;

No i a plus dan e neguna maniera;

Que bona domna a tan d' enseignamen;

Qu'ab gen parlar s' en part cortesamen.

Domna, eu tem que, si 'l deman s' amor,

Que m responda so que mal me sabra,

E que s' albir son pretz e sa ricor,

E que m digua que ja no m' amara.

Miel m' er, so cre, que il serva et atenda

Tro qu' il plassa que guazardon mi renda;

E digatz me, segon vostre escien,

Si farai ben o s' eu dic faillimen.

Seingner, totz temps fols a folia cor;

Mas cels es fols que la folia fai,

E cant hom sers lai on non a valor,

Pois s' en penet, que nuill gazaing non a;

Ans deu saber que ja gair' en despenda,

Si 'n pot aver guizardon ni esmenda;

E si 'l conois qu' ill aia bon talen,

Serva si dons en patz e bonamen.

Bona domna, pois aissi me laudatz,

Ieu l' enquerai ades senes faillir,

E tenc per bon lo conseill que m donatz,

Ni ja no 'l voill ni camjar ni gequir;

Que ben sabetz del don, senes faillensa,

Si vol amar, o si a entendensa;

E podetz m' en valer veraiamen,

Sol vos plassa, ni 'l cors vos o cossen.

Seingner, e us prec que la domna m digatz

On eu vos puesc' e valer e servir;

E dic vos ben, e voill que me crezatz,

Qu' ie us en sabrai la vertat descobrir,

E far vos n' ai aisina e cosensa

Mantas sasos, s' en leis en trob faillenssa;

E digatz la ades de mantenen,

E non doptetz ni n' aiatz espaven.

Bona domna, tant es cortes' e pros,

Que ben sabetz s' ieu vos am ni us vol be;

Que tal joi ai quant puosc parlar ab vos

Que de ren al no m membra ni m sove;

E doncs podetz saber a ma semblansa

E conoisser... Mon dig vas vos balansa!...

Vos es cella vas cui mos cors s' aten.

Merce, domna, car tan dic d' ardimen!

Tenson d' Albert et de Pierre.

Tenson d' Albert et de Pierre.

En Peire, duy pro cavalier

An mes tot lur entendemen

En una pros dompna valen,

E fan n' amduy gran messio;

Mas l' us en sap triar son pro

E 'n melhuyra son afaire,

E l' autr' es del sieu gastaire

Tan que mermatz n' es de gran re.

De qual deu mielhs aver merce,

Segon so que us n' es veiayre?

Albert, selh que met e conquier,

E sap retener, e despen,

E met lo sieu honradamen,

Deu aver mais de gazardo

Que selh que met tot a bando;

Que folhs pareys e muzaire

Qui ve fol far, e no pot faire

So qu' a amic tanh e cove;

E meyns a de bon pretz ab se

Selh qu' a tot dat qu' el donaire.

Amicx Peire, per messongier

Vos en tenran li conoyssen;

Que selh que a destruimen

Met lo sieu, e non garda co,

E no serca ga ni razo,

Dic qu' es plus fizels amaire

Qu'el vostre qu' es amassaire;

E drutz qu' amassa ni rete

Non ama ges per bona fe,

Ans es, ves si dons, trichaire.

Albert, be us tenc per ufanier,

Quar mais prezatz foudatz que sen.

E non es doncx plus avinen

Qu' hom digua: Pros es que pros fo?

Quar qui sol dir oc e ditz no.

Si era reys o emperaire,

Sos pretz no pot valer gaire.

Per qu' ancmais selh que no s recre,

E creys lo sieu, e pretz mante,

Deu bona dompna retraire.