Sirvente anonyme. Vai Hugonet, ses bistensa,

Sirvente anonyme.

Vai Hugonet, ses bistensa,

Al franc rey aragones,

Chanta 'l noel sirventes,

E di 'l trop fai gran suffrensa,

Si qu' hom lo ten a falhensa,

Quar sai dizon que Frances

An sa terra en tenensa

Tan longamen que s' estensa;

E pus l' an aitan conques,

Agues de say sovinensa.

E di 'l que sa gran valensa

Se doblara per un tres,

Si 'l vezem en Carcasses,

Cum bos reys, culhir sa sensa;

E, si 'lh atroba defensa,

Fassa semblan que greu l' es,

Et ab aital captenensa

Qu'ab fuec et ab sanc los vensa,

E genhs tragan tan espes

Que murs no y fassan guirensa.

E quar en aissi s poiria

Acabar lur mals ressos,

Que dizon, Senher, de vos

Fals Frances, que Dieus maldia,

Quan no venjatz la folia,

E quar etz tan vergonhos;

No m cal pus apert o diga,

Paratges s' en revenria

Que s perdet totz say mest nos,

Que neyssas no y conosc via.

Elms et ausbercx me plairia

Et astas, ab bels penos,

Vissem hueimais pels cambos,

E senhals de manta guia,

E que ns visson, ad un dia,

Essems li Frances e nos,

Per vezer quals miels poiria

Aver de cavalhairia,

E, quar es nostra razos,

Cre qu' el dans ab els n' iria.

Pros coms, marques de bon aire,

El camp feren e donan

Fos restauratz lo greu dan,

Agratz cobratz manht repaire.

Codelet.

Codelet.

On a de lui une tenson avec Giraud Riquier et Michel de Castillon: voici la réponse qu' il fait à Giraud Riquier sur une question d' amour:

Guiraud Riquier, bel e bo

M' es qu' ieu diga, en chantan,

Mon cor de bela razo

Que vos me metetz.

Si mi dons, qu' es d' avinen

Mens, garda am fals parven,

Lo selatz l' i prenc ab bon grat,

Sitot s' esdesleya

Amor que m guerreya.

A 'N Miquel.

Tenson de Guillaume Rainols et de Guillaume Magret.

Tenson de Guillaume Rainols et de Guillaume Magret.

Magret, puiat m' es el cap

So qu' inz el ventre no m cap;

Bons es per listr' e per drap,

Mas qui be us quier ni us esterna

Trobar vos pot, si no us sap,

Pres del vaissel ab l' enap,

Qu'ades tendetz vostre trap

Lai on sintetz la taverna.

Guillems Ranols, a mescap

Metrai mos motz qu' ieu arap

De tal loc, e trop non gap,

On non voill lum ni lanterna;

E s' ieu a vilans escap

Si que neguns no m' atrap,

Don tenc lor parlar per gap,

En talant ai que us esquerna.

A penas i trop que i lim

Merce d' En Bernart Razim,

Magret, que us ten sec e prim

En estiu, e quant iverna;

E us ai vist un tal noirim,

Los vairons qu' avetz el cim,

Que us fan plus lag de Caym,

E us reverson la luzerna.

Guillems, de la claustra us vim

Issir enceint ab un vim;

E s' ieu de vos no m' escrim

Non voill mais beure a Maerna,

Qu'anc, pois nos enjoglarim,

Vos n' ieu non sai auzim

Tan bos motz ni que meils rim

Com vos don l' arma s' enferna...