LIV, Nostre reys qu' es d' onor ses par (Bernard d' Auriac) - Oil e nenil, en luec d' oc e de No.

LIV.

Nostre reys qu' es d' onor ses par

Vol desplegar

Son gomfano,

Don veyrem per terra e per mar

Las Flors anar;

E sap mi bo,

Qu' eras sabran Aragones

Qui son Frances;

E 'ls Catalas estregz cortes

Veyran las Flors, flors d' onrada semensa,

Et auziran dire per Arago

OIL e NENIL en luec d' oc e de No.

E qui vol culhir ni trencar

Las flors, be m par

No sap quals so

Li ortola que, per gardar,

Fan ajustar

Tan ric baro,

Quar li ortola son tals tres

Que quascus es

Reys plus ricx qu' el Barsalones;

E dieus e fes es ab lur e crezensa;

Donc quan seran outra Moncanego,

No y laysson tor ni palays ni mayso.

Catala, no us desplassa ges

Si 'l reys frances

Vos vai vezer ab bels arnes,

Qu' apenre vol de vostra captenensa

Et absolver ab lansa et ab bordo, 

Quar trop estaitz en l' escominio.

Bernard d' Auriac.

LIII, Al bon rey qu' es reys de pretz car,

LIII.

Al bon rey qu' es reys de pretz car,

Reys de Castella e de Leo,

Reys d' aculhir e reys d' onrar,

Reys de rendre bon guiardo,

Reys de valor e reys de cortezia,

Reys a cui platz joys e solatz tot l' an

Qui vol saber de far bos faitz s' en an,

Qu' en luec del mon tan be no 'ls apenria.

Quar el ten cort on fadiar

No s pot nulhs hom bos en son do,

E cort ses tolr' e ses forsar

E cort on escot' om razo;

Cort ses erguelh e cort ses vilania,

E cort on a cent donadors que fan

D' aitan ricx dos mantas vetz ses deman,

Cum de tals reys qu' ieu sai qui 'l lor queria.

Mais un rey no 'l sai contrapar

De largueza, s' agues tan bo

Poder cum elh a de donar,

So es lo franc rey d' Arago

Qu' a tan son cor en valor qu' elh faria

Pauc tot lo mon accomplir lo talan

Qu' a en donar, e dari' atretan

Cum hom del mon Don Peire, s' o avia.

Mas d' aisso m fan meravilhar

L' eligidor qu' eligit so,

Qui puescon emperador far,

Cum no 'l meto en tenezo

De l' emperi selh a cuy tanheria,

Lo valen rey 'N Anfos qu' a pretz prezan,

Qu' om del mon miels non tenc cort ab boban,

Creyssen de pretz e d' onor tota via.

Qu' entre 'ls Lombartz auzi contar

Que l' Alaman e 'l Bramanso

E 'l Roman, ses tot contrastar,

Volon a lui la lectio

Del emperi, e Milan e Pavia,

Cremona et Ast e Ginoes an gran

Cor, qu' el bon rey castellan recebran

A gran honor, si ven en Lombardia.

E qui 'l papa pogues citar

A maior de se fora bo,

Quar del rey 'N Anfos no vol far

E del rey Carle bon perdo,

E qu' om rendes N Enric qu' ora seria,

E l' emperi non estes pus vacan;

E pueis, ab totz los reys que baptism' an,

Anes venjar Ihesu Crist en Suria.

Reis castellas, vostra valor se tria

Part las valors que tug l' autre rey an,

E miels sabetz gardar home de dan,

Que venh' a vos, qu' autre reys qu' el mun sia.

Mon sirventesc, Bernat, leu ses fadia

En Castella portatz a Don Ferran,

E digatz li que s tenh' ades denan

Qui es ni don, e fara bona via.

Folquet de Lunel.

LII, Comte Karle, ie us vuelh far entenden

LII.

Comte Karle, ie us vuelh far entenden

Un sirventes qu' es de vera razos;

Mos mestiers es qu' ieu dey lauzar los pros,

E dei blasmar los croys adreitamen;

E devetz me de mon dreitz mantener,

Quar mos dreitz es que dey blasmar los tortz; 

E si d' aisso m' avenia nulh dan,

Vos per aisso en devetz far deman.

Ar chantarai de vos primeiramen

Cum del plus aut linhatge que anc fos

Etz, e foratz en totz faitz cabalos,

Si fossetz larcx; don avetz pauc talan,

Que be n' avetz la terra e 'l poder;

Et en vos es guays solatz e deportz,

E troba us hom adreyt e gen parlan

Et avinen, ab qu' om res no us deman.

Senher, autz hom viu say aunidamen,

Quan pert lo sieu e non es rancuros;

Qu' el Dalfis te vostras possessios,

E non avetz so que trobatz queren,

Qu' em breu poyretz osteiar e jazer

Per ribeiras e per pratz e per ortz,

Tro que pensetz si al vostre coman,

Ho al Dalfin n' aiatz tout atretan.

De tal guerra mi paretz enveyos,

Que us auran ops cavaliers e sirven;

E si voletz que us siervon leyalmen

Los Proensals, senher coms, gardatz los,

De la forsa de totz vostres bailos

Que fan a tort molt greu comandamen;

Mas tot es dreg sol qu' ilh n' ayon l' argen,

Don li baro se tenon tug per mortz,

Qu' hom lur sol dar, aras los vai rauban,

E denan vos non auzon far deman.

Ar auran luec pro cavalier valen

E soudadier ardit e coratjos

Elmes e brans, tendas e papallos

Escutz, ausbercx e bon cavalh corren,

E fortz castelhs desrocar e cazer,

E gaug e plor mesclat ab desconortz,

En batailla cazen, feren, levan

E vuelh o ben, e m play, sol qu' ieu no y an.

Granet.