Raimond de Miraval. Selh que no vol auzir chansos

Raimond de Miraval. 

Selh que no vol auzir chansos

De nostra companhia s gar,

Qu' ieu chan per mon cor alegrar 

E per solatz dels companhos, 

E plus per so qu' esdevengues 

En chanso qu' a mi dons plagues; 

Qu' autra voluntatz no m destreng 

De solatz ni de belh captenh.

Pauc val qui non es enveyos, 

E qui no dezira 'l plus car;

E qui no s' entremet d' amar,

Non pot essor valens ni pros;

Que d' amar ven gaugz e ven bes,

E per amor es hom cortes;

Et amors dona l' art e 'l genh

Per que bos pretz troba mantenh.

Ben es savis a ley de tos,

Qui drut blasma de folheiar,

C'om, pos que s sap amezurar, 

Non es pueys adregz amoros; 

Mas selh que sap far nescies, 

Aquel sap d' amor tot quan n' es; 

Qu'eu no sai trop ni no m' en fenh, 

Ni ja no vuelh qu' om m' en essenh.

De la belha cuy suy cochos,

Dezir lo tener e 'l baizar

E 'l jazer e 'l plus conquistar, 

Et apres mangas e cordos, 

E del plus que 'l prengua merces; 

Qu' ieu no serai jamais conques

Per joias ni per entresenh, 

Si so que plus vuelh non atenh.

Ben aya qui prim fon gilos, 

Que tan cortes mestier saup far; 

Quar gilozia m fai gardar 

De folhs parliers e d' enoios. 

De gilozia ay tant apres 

Que mi eys en tenc en defes 

Ab mi dons, que autra non denh, 

Neys del cortejar m' en estenh;

E val mais belha tracios,

Don ja hom non trobe son par, 

Qu' autrui benenans' enveyar, 

Quan Dieus ne vol ajustar dos; 

De dona vuelh que l' ajut fes,

E que ja no l' en sobre res, 

Per que m' enquier on vau, d' on venh,

Pus del tot a son plazer tenh.

N' Audiartz, de vos ai apres

Que d' una sola sui cortes, 

E d' una chan e d' una m fenh, 

E d' aquelha Miravalh tenh.

Atrobaretz greu qu' us n' essenh

D'amar, pus ieu de vos n' aprenh.

Elias de Barjols. Bon' aventura don Dieus

Elias de Barjols. 

Bon' aventura don Dieus 

A mos huelhs et a mon cor,

Quar an la gensor chauzida 

Del mon e la plus avinen; 

E no y menti, mon escien, 

Ans sai e conosc que vers es 

Qu' enaissi m venha de leys bes, 

Cum ieu cug ver dire; 

E s' ieu men, ja no 'n sia jauzire.

E pero vuelh esser sieus 

Lialmen e de bon cor, 

Quar es la plus yssernida; 

E ja non trobara conten 

De beutat ni d' ensenhamen, 

Ans puesc ben dire que sieus es, 

Qu'el plus ric senhoriu s' es mes, 

Qu'en tot lo mon se mire, 

Per qu' ieu li suy leyals hom e servire.

Si totz lo mons era mieus, 

Non auria gaug mon cor 

Ses lieys, que tant es grazida, 

Cuy am e dezir finamen; 

E, si erguelh ni fallimen 

Fas quar la prec ni 'l clam merces, 

Ja 'l sieu gen cors guai e cortes, 

S'a lui plai, no s n' azire. 

Qu'al fol deu hom sas foldatz laissar dire.

Si tan gen muri Andrieus,

Non amet miels en son cor 

Qu' ieu fas lieys, qu' ai encobida. 

No sai si m fas foldat o sen, 

Quar en tan honrat loc enten; 

Per Dieu, Amors, si foldatz es, 

Me perdonatz est nescies, 

Qu' ie m laissaria aucire 

Ans qu'en partis mon cor ni mon dezire! 

Nulhs afans no m' es grieus,

Tan la dezir en mon cor!

Quar tan l' aurai servida, 

Prec li, per son belh chauzimen, 

Si paratges la y defen 

Q' umilitatz la 'n retengues; 

Qu' Amors m' a si lassat e pres

Que no sai on mi vire,

Ni no sai ieu de que me puesca rire.

Chanso, la comtessa valen

De Savoya, on fin pretz es, 

Me saluda, e 'l pros marques;

E sapchas li ben dire 

Qu'el genser es qu'en tot lo mon se mire. 

___

Conoyssens suy a mon dan, 

Dompna, quan conosc en vos

Lo plazen semblan amoros 

E 'l vostre guai cors prezan,

Qu'anc pueys non ac poder en me

Que m pogues de vos estraire, 

Ni vas degun' autra traire,

Ni a vos, dona, clamar merce.

Mas bon cor ai del afan,

Dona, que ieu trac per vos;

Quar bos senhers ren bos guiardos, 

Qui be 'l ser de voluntat gran. 

Servida us ai per bona fe, 

Ab ben amar, ses cor vaire;

E si pus y pogues faire,

Ja no m' en tarzera en re.

Ges no m lau ni m vau comjadan, 

Avinen dona, per vos,

Ni es mais del cel en jos

Nulh' autra que ieu am tan;

E fas effortz, quar no m recre,

Valen dompna, de bon aire, 

Pus no us aus mon cor retraire, 

Ni preyar que m fassatz nulh be.

Ben podetz far vostre coman

Qu' ieu non ai poder en vos,

Ni suy de tan poderos

Que mon fin cor, ses enjan,

No us aus far saber, ni s cove;

Mas ieu, cum bos sufertaire 

E cum fis leyals amaire

Sofrirai, qu' a sofrir m' ave.

E quar no us aus far semblan,

Dona, dregz fora de vos

Vostra merce bona fos,

Que us anassetz albiran 

Quo vos am e us vuelh e us cre, 

E us suy de ben razonaire; 

Quar adoncs no m tengra guaire

Lo maltratz que per vos mi ve.

Hugues de Saint-Cyr. Un sirventes vuelh far en aquest son d' En Gui,

Hugues de Saint-Cyr.

Un sirventes vuelh far en aquest son d' En Gui,

Que farai a falhensa mandar a 'N Guillami, 

Et al comte Gui Guerra, e 'N Miquel Morezi, 

Et a 'N Bernart de Fosc, et a sier Ugoli, 

Et als autres que son layns de lor fesi; 

E sapchan cum calor de laintre esti, 

Qu'el sens e 'l noms e 'l pretz laus qu' om de lor di

Los corona d' onor, sol fassan bona fi.

Bona fi deu ben far, e Dieus li deu far be, 

Qui franqueza et dreitura e la gleyza mante 

Contra sel que non a en Dieu ni en leis fe, 

Ni vida apres mort, ni paradis non cre, 

E dis c'om es niens depueis que pert l' ale, 

E crueltatz l' a tolta pietat e merce, 

Ni tem layda falhida fayre de nulla re;

E totz bos faitz desonra, baysa e descapte.

Si 'l chapte 'l coms Reimons gart qu'en fassa son pro,

Qu' ieu vi qu' el papa 'l tolc Argens' et Avinho,

E Nemz' e Carpentras, Vennasqu' e Cavalho,

Uzetge e Melguer, Rodes e Boazo,

Tolzan et Agenes, e Caors e Guordo,

E 'n mori sos coynhatz lo bons reis d' Arago;

E s' el torna la preza per aital ochaizo,

Encar l' er a portar el man l' autrui falco.

Lo falcos, fils de l' aigla, que es reys dels Frances,

Sapcha que Fredericx a promes als Engles

Qu'el lor rendra Bretanha, Anjou e Toarces, 

E Peytau e Sayntonge, Lemotges, Engolmes, 

Tolonj' e Normandia e Guiana e 'l Paes, 

E venjara Tolsan, Bezers e Carcasses; 

Doncs besonh a que Fransa mantenha Milanes

E 'N Albaric, que tolc que lay passatz non es.

Passatz lai fora ben, si 'lh n' agues lo poder,

Que de ren als non a desirier ni voler,

Mas cum Frans' e la gleysa el pogues decazer,

E la soa crezensa e sa ley far tener;

Don la gleysa e 'l reys y denhon pervezer,

Que ns mandon la crozada, e ns venhan mantener;

Et anem, lai en Polla, lo regne conquerer,

Quar selh qu'en Dieu non cre non deu terra tener.

Ges Flandres ni Savoya no 'l devon mantener,

Tan lor deu del elieg de Valensa doler.